Water in Suid-Afrika

Suid-Afrika kry minder reën as die meeste lande in die wêreld. Die reën val ook nie oral ewe veel nie: die ooste is natter, en die weste is baie droog.

Ons water kom uit verskillende plekke:

• Riviere wat van die berge af vloei.
• Damme wat riviere se water opgaar.
• Grondwater onder die grond, wat ons met ’n boorgat uitpomp, en fonteine.
• Reënwater wat ons in ’n tenk opvang.

In dorpe en stede het die meeste mense ’n kraan in die huis of op die erf. In baie landelike gebiede deel mense ’n gemeenskaplike kraan, pomp hulle water uit ’n put of boorgat, of haal hulle water uit ’n rivier of stroom en dra dit in emmers huis toe. Rivierwater kan vuil wees, dit kan in ’n droogte opdroog, en mense moet dikwels ver loop om dit te gaan haal.

Die Oranjerivier is Suid-Afrika se langste rivier. Hy vloei van die berge in Lesotho tot in die Atlantiese Oseaan. Die Vaalrivier vloei in die Oranjerivier in.

’n Dam is ’n muur oor ’n rivier wat die water keer en opgaar vir droë tye. Die Gariepdam in die Oranjerivier is ons grootste dam.

Die water in jou kraan het ’n lang pad gekom:

1. Dit word in ’n dam opgegaar.
2. ’n Suiweringsaanleg maak dit skoon en veilig.
3. Pype neem dit na ’n opgaartenk (reservoir) bo-op ’n heuwel.
4. Van daar vloei dit deur pype tot by jou kraan.

Omdat ons min water het, moet almal help om dit te spaar:

• Stort kort in plaas daarvan om te bad.
• Draai die kraan toe terwyl jy jou tande borsel.
• Laat lekkende krane en pype regmaak.
• Gebruik reënwater vir die tuin.

Meerkat-wenk

Een lekkende kraan kan in ’n dag ’n hele emmer water mors!